Bexen Cardiok Madril kardio-babestu du EMTren autobus-flota osoa 2.200 desfibriladorez hornituta

• Bexen Cardio arduratuko da EMTren Madrilgo autobus-flota osorako 2.200 desfibriladoreak hornitu, instalatu eta mantentzeaz. Instalatze-lanak datorren urrian amaituko dira.
• Autobusek Reanibex 100 desfibriladorea izango dute. Osasun-arloko prestakuntzarik ez duten pertsonek bihotz-biriketako geldialdi baten aurrean erabiltzeko diseinatutako gailua da. Ekipoak erabiltzailea urratsez urrats gidatzen du jarraibideen bidez, eta automatikoki aktibatzen du 112rako abisua, erantzun azkarra eta koordinatua erraztuz.
• Kooperatibak -desfibriladoreen estatuko fabrikatzaile bakarrak- ekipoen egoera operatiboa urrutitik eta denbora errealean, eguneko 24 orduetan, monitorizatzeko aukera ematen duen soluzio integral konektatua garatu du.

Bexen Cardiok, MONDRAGON Korporazioaren kide eta estatu mailan desfibriladoreen fabrikatzaile bakarra den enpresak, EMTren Madrilgo autobus-flota hornituko du Reanibex 100 desfibriladore automatizatuekin eta haien instalatzeaz eta mantentzeaz ere arduratuko da.

EMT Madrid-en flota osoa kardio-babesteko proiektua gaur aurkeztu da Cibeles Jauregian, José Luis Martínez-Almeida Madrilgo alkatea buru izan duen ekitaldian. Harekin batera izan dira Borja Carabante Hirigintza, Ingurumen eta Mugikortasuneko ordezkaria eta Alfonso Sánchez EMT Madrid-eko kontseilari delegatua.

Aurkezpenean, Bexen Cardiok Reanibex 100 desfibriladorearen eta kardio-babes konektatuko gailuak nola funtzionatzen duen erakutsi du. Soluzio horri esker, autobusen flotan instalatutako ekipoen egoera operatiboa denbora errealean monitorizatu ahal izango da.

Ekitaldian izan dira, halaber, Javier Amezaga MONDRAGONen presidenteordea; Ramón Gomez Ugalde MONDRAGONen Harreman Instituzionaletako zuzendaria; eta Digna Gonzalez, Bexen Cardioren zuzendari nagusia.

Desfibriladoreen instalazioa uztailean hasi da, eta proiektua datorren urrian amaituko da. Une horretatik aurrera, udal-autobus guztiek desfibriladore bana izango dute barruan. Ekimenak milioika erabiltzaileren segurtasuna indartuko du eta Madril erreferente bihurtuko du garraio publikoari aplikatutako kardio-babesean.

Flota osoan 2.200 desfibriladore instalatuta, Madrilek kardio-babeserako sare mugikor paregabea izango du. Ekipoak etengabe ibiliko dira hirian zehar, eta, horri esker, bihotz-biriketako geldialdi baten aurrean desfibriladore bat eskuratzeko behar den denbora murriztu ahal izango da. Denbora hori funtsezkoa da bizirauteko probabilitateak handitzeko.

EMT Madrid-eko autobusek ehunka mila bidaiari garraiatzen dituzte egunero. Horregatik, desfibriladoreak instalatuta, udal-sarea herritarren zerbitzura dagoen kardio-babestutako espazio garrantzitsu bihurtuko da. Gainera, ekipo horiek ikusgai egoteak bihotz-biriketako geldialdi baten aurrean azkar jardutearen eta biziraupen-katea lehenbailehen abiaraztearen garrantziaz kontzientziatzen lagunduko du.

Kontratua joan den martxoan esleitu zitzaion Bexen Cardiori. 2.897.040 euroko zenbatekoa du, BEZik gabe, eta ekipoen hornidura, instalazioa, mantentzea eta gorabeheren kudeaketa barne hartzen ditu bost urtez, renting eredu baten bidez.

Bizitzak salbatzeko teknologia

Autobusek Reanibex 100 izango dute, Bexen Cardiok estatuan diseinatu eta fabrikatutako desfibriladore automatizatua. Ekipoa paziente helduak zein pediatrikoak artatzeko prestatuta dago, eta osasun-arloko prestakuntzarik ez duten pertsonek larrialdi-egoera batean modu erraz, seguru eta intuitiboan erabiltzeko garatu da.

Gailuak erreskatatzailea erreanimazio-prozesu osoan zehar gidatzen du ahozko jarraibide argien bidez: partxeak jartzen direnetik bihotz-biriketako bizkortzea egin arte eta, beharrezkoa denean, deskarga eman arte ere bai.

Gainera, bihotz-biriketako bizkortzea egiteko laguntzak ditu, hala nola metronomoa eta bularreko konpresioen maiztasunari buruzko denbora errealeko retroalimentazio-sistema. Horri esker, BBBren (bihotz-biriken bizkortzea) kalitatea hobetzen eta bihotz-geldialdi baten aurrean bizirauteko aukerak handitzen laguntzen du.

Reanibex 100ak geolokalizazio-sistema integratua ere badu, ekipo bakoitza une oro non dagoen jakiteko aukera ematen duena. Bere diseinuak espazio publikoetan eta garraio kolektiboko ibilgailuetan integratzea errazten du, minutu bakoitzak garrantzia duen egoeretan erabilera azkarra eta erraza bermatuz.

Urrutiko monitorizazioa, eguneko 24 orduetan

Bexen Cardiok garatutako kardio-babes konektatuko soluzio integralari esker, EMT Madrid-en flotan instalatutako 2.200 desfibriladoreen egoera urrutitik monitorizatu ahal izango da, eguneko 24 orduetan.

Ekipo guztien funtzionamendua etengabe kontrolatzeak edozein gorabehera azkar hautematea eta kudeatzea ahalbidetzen du, ekipoak une oro erabilgarri eta egoera operatibo egokian daudela bermatzeko.

Larrialdi bat gertatuz gero, desfibriladorea euskarritik kentzean, automatikoki aktibatzen da 112rako abisua eta ekipoaren kokapena bidaltzen da, larrialdi-zerbitzuen koordinazioa erraztuz. Gailua automatikoki pizten da estalkia irekitzean, eta erabiltzailea prozesu osoan zehar gidatzen du ahozko jarraibide argien bidez.