Bexen Medicalek eta Erreka Medicalek Adaptha proiektua bultzatu dute i+Med eta RPKrekin batera, gailu mediko adimendunak garatzeko
MONDRAGON Health aliantzako kide diren Bexen Medical eta Erreka Medical Adaptha proiektua bultzatzen duen partzuergoko kide dira. Ekimen estrategiko horren helburua gailu mediko aurreratuetan aplikatutako biomaterial adimendunen belaunaldi berri bat garatzea da. Partzuergoan i+Med bioteknologia-enpresak eta RPK Groupek ere parte hartzen dute eta 5,8 milioi euroko aurrekontua du, 34 hilabeteko gauzatze-egutegiarekin (2026-2028).
Proiektuak zuzenean erantzuten dio biztanleriaren zahartzeari, patologia kronikoen prebalentzia handiagoari eta osasun-sistemetan terapia pertsonalizatuen gero eta eskari handiagoari. Testuinguru horretan, Adapthak konponbide kliniko zehatzagoak, biobateragarriagoak eta seguruagoak egituratu nahi ditu. Horretarako, plataforma komun batetik biomaterialen arloko berrikuntzak hainbat osasun-aplikaziotara transferitzea ahalbidetuko duen zeharkako arkitektura bat sortu nahi da.
Hidrogel adimendunak eta aliantzaren funtsezko gaitasun teknikoak
Ekimenaren muin teknikoak gailu medikoetan hidrogel adimendunak diseinatzeko, sintetizatzeko eta integratzeko plataforma integral bat sortzea aurreikusten du. Partzuergoaren industria-gaitasunen banaketan, MONDRAGON Healtheko bi kooperatiben zeregina erabakigarria da: Bexen Medicalek baldintza antzuetan polimeroak aldatzeko ekipamenduen garapena eta gainazal funtzionalizatuak dituzten zunda nasogastrikoen aurrerapena gidatzen ditu; Errekak, berriz, hidrogelak prozesatzeko mikrofluidika-teknologia aurreratuetan duen espezializazioa eskaintzen du. Horrela, i+Med-ekin NanoSpharm bezalako proiektuetan aurretik abiatutako lankidetza-ildoa indartzen du.
Gaitasun bateratu horiei esker, doitasun handiko eta seriean errepikatzeko moduko industria-fabrikazioan aurrerapauso handia emango da. Horri esker, hainbat soluzio berritzaile garatu ahal izango dira: begi lehor kroniko eta larrirako gordailu oftalmiko berriak, sendagaiak modu kontrolatuan askatzen dituzten garezur-finkapeneko gailuak, marruskadura txikiko estaldura duten gida medikoak eta laguntza-zunda aurreratuak. Horrela, kooperatibek zuzenean laguntzen dute euskal osasun-sektorearen subiranotasun teknologikoa eta ekoizpen-autonomia sendotzen.
‘Smart Hydrogels’ estrategiaren ardatz nagusia Euskadin
Adaptha Eusko Jaurlaritzaren Industria Plana – Euskadi 2030 planaren barruan kokatzen den Smart Hydrogels for Personalized Nanomedicine proiektu eraldatzailearen muin teknologikoa da. Plan honek 72 milioi euroko hasierako inbertsio globala aurreikusten du hiru urtean —horietatik 28 milioi I+Gra bideratuta berariaz—, baita 2028ra arte 230 enplegu kualifikatu zuzen baino gehiago eta zeharkako 370 inguruko lan-eragina ere.
Industria-partzuergoak, halaber, Zientzia, Teknologia eta Berrikuntzaren Euskal Sareko zentroen laguntza du —besteak beste, Gaiker, Polymat, CIC biomaGUNE, CIC nanoGUNE, Tecnalia, Tekniker eta UPV/EHU—, baita Basque Health Clusterren babesa ere. Adapthan parte hartuta, MONDRAGON Healthek MedTech sektorean duen kokapena sendotu du. Horrela, agerian utzi du bere kooperatiben arteko industria-lankidetzak nabarmen bultzatzen duela ikerketa biomedikoa serieko ekoizpen kliniko bihurtzeko bidea.