“Elektronika inprimatuak kableak kentzea eta diagnostiko orokorra hobetzea ahalbidetzen du”

• Embega Healthcareko Komertzio eta Berrikuntza zuzendariak elektronika malguak MedTech sektorean duen eragina aztertu du, baita kooperatibak MONDRAGON Healthekin bat egin ostean dituen helburu nagusiak ere.

Osasunaren industriak konponbide arinagoak, zehatzagoak eta ez hain inbaditzaileak lortzeko eraldaketa bizi du. Egoera honetan, Embega Healthcare bazkide estrategiko gisa kokatu da, berrikuntza medikoa industrializatzeko gaitasuna erakutsiz. Javier Perezekin, kooperatibako Komertzio eta Berrikuntza zuzendariarekin, hitz egin dugu teknologiari, industria-erronkei eta lankidetzaren balioari buruz.

Embegak 50 urte baino gehiagoko ibilbide industriala du. Nola eta zergatik erabakitzen du errotutako kooperatiba batek osasun-sektorerako jauzi estrategikoa ematea?

Embegan, MONDRAGON Taldearen balioekin bat eginez, gure DNAn daramatzagu etengabeko hobekuntza, berrikuntza eta teknologia berrietara egokitzeko gaitasuna. Historikoki, hirugarrenentzako osagaien fabrikatzaile profilak aukera eman digu negozio-lerro desberdinen bidez sektore batetik bestera mugitzeko, elektronika inprimatuko gure unitatearen kasuan bezala.

Merkatuaren beharretara egokitzeko malgutasun horrek ahalbidetu digu sektore berrietan jarduerari ekitea. Berriki, Sendagaien eta Osasun Produktuen Espainiako Agentziaren (AEMPS) ziurtagiria lortu dugu hirugarrenentzako gailu sanitarioen fabrikatzaile gisa. Hala ere, bultzada erreala kanpotik barrura sortu zen: urteak generamatzan aplikazio medikoetarako elektronika malguko osagaiak garatzeko eskaerak jasotzen, hala nola plantilla sentsorizatuak edo elektrodo terapeutikoak. Embega Healthcare marka Bexen Cardioko gure bazkideek erreferentziatutako proiektu baten harira egituratu genuen; haiek mapeo kardiakorako gailu konplexu baten fabrikatzaile izatea proposatu zigutenean.

“Kontzeptu klinikoak gailu eskalagarri” bihurtzen dituen bazkide gisa definitzen duzue zuen burua. Zein da ideia mediko batek duen erronkarik handiena laborategitik industria-produkziorako jauzia eman nahi duenean?

Medikuntza sektorea arautuenetako bat da eta sarrera-hesi handiak ditu. Horrek esan nahi du hasierako balio ekonomiko handia behar dela jarduteko, eta horrek finantza-arrisku nabarmena dakar. Sektoreko startup askok finantza-“zonbi” bihurtzeko joera dute: ez dute lortzen aireratzea ezta fakturazio garrantzitsurik lortzea ere, baina, osasun-arloan egonda, bizirauteko adina finantzaketa jasotzen dute, nahiz eta eskalatzeko adina ez izan.

Hau sektore askotan gertatzen da, baina Europako araudiak nabarmen zailtzen du prozesua. Enpresek euren produktua merkatuan azkar baliozkotu behar dute, eta behin bezeroaren eskaria asetzen duen product-market fit sendoa lortutakoan, orduan dator erronka handia: adopzio masiboa bilatzea, garapenak laborategitik lantegirako jauzia eman dezan.

Merkatuak elektronika malgu inprimatuaz hitz egiten du MedTech-eko estandar berri gisa. Zer abantaila erreal eskaintzen ditu teknologia honek kostuetan eta pazientearen erosotasunean?

Agian “estandar berri” batez hitz egitea gehiegi aurreratzea da. Elektronika inprimatuak abantaila ergonomikoak eta erabiltzaile-esperientzia hobea eskaintzen dituen arren, hazkunde-fasean dagoen teknologia da oraindik. Ospitale-ingurunean dagoeneko produktu helduetan badago ere, osasun-profesional guztiek ez dute oraindik ezagutzen.

Hala ere, onurak argiak dira: diseinuan eta kostuetan abantailak dakartza, baina, batez ere, kableak kentzea ahalbidetzen du. Zirkuituak diseina daitezke langile klinikoek elektrodo bakoitzeko kable bat konektatu behar izan ez dezaten, adibidez, elektrokardiograma bat egiteko. Horrek gailuen erabilera errazten du, arreta-denborak murrizten ditu eta, azken finean, diagnostiko orokorra hobetzen du.

Kardiologia, neurologia eta errehabilitazioa dira zuen gako-arloak. Eman diezagukezu Embega Healthcare-k garatutako adibide zehatz bat?

Gaur egun, kardiologia interbentzionistan lortutako aurrerapenak oso garrantzitsuak dira. Gailu minimo inbasiboen garapena eguneroko kontua da, osasun digitaletik hasi eta erresonantzia magnetiko bidezko irudiraino (MRI).

Embegan balioa gehitzen ari gara lerro horretan, elektronika inprimatuari esker. Egun, fibrilazio aurikularraren ondoriozko arritmiak lokalizatzea eta profesionalari ablazio bat non egin behar duen (target-a) hamar minutuan adieraztea ahalbidetzen duen lehen elektrodo-txalekoa hornitzen dugu. Espezialitatearentzat oso aurrerapen esanguratsua da, eta harro gaude arlo industrialetik gure aletxoa eskaintzeaz.

Datozen bost urteei begira, zein bide hartuko du Embega Healthcarek? Eta zer-nolako bultzada ematen dizue aliantza honetako kide izateak?

Uste dugu osagaien fabrikatzaile baten lanak balio gehiago ematen diola bezeroari bazkide onekin batera egiten denean. Horregatik, lankidetza estuan ari gara MC3 gure I+G-ko bazkidearekin eta MONDRAGON Healthekin, diseinuan ere balioa emango duen fabrikatzaile gisa finkatzeko.

Gure helburua ez da soilik bolumen handiko ekoizpenetan industria-eraginkortasuna eskaintzea, baizik eta laguntza integral bat ematea: hasierako ideiatik serieko fabrikazioraino. Sektorean CDMO (Contract Development and Manufacturing Organization) izenez ezagutzen dugun kontzeptua da, eta aliantza honen parte izateak helburu hori lortzeko behar dugun bultzada ematen digu.